دموع
كل يوم يبدأ الليل وتبدأ دموعي معاه انا تعبت ومرهقة اوي انا الي بيحركني الفترة دي بس هو طب بشري عين شمس لو مدخلتش انا ممكن يحصلي حاجه رغم الغلطات وعدم فهمي في الفيزياء والكيمياء والانجليزي انا مستمرة
الاستمرارية = نجاح
يمكن ده الي محركني دلوقتي عندي ذرة أمل انه ممكن اقدر اغير حاجه اقدر اغير قدر حصلي في تالتة اقدر اعمل تغيير وانجح واعيش الي بتخيله لحد انهاردة انا مش واثقة في نفسي اني اقدر اعملها بس الآمال البشرية والإنسانية اني عندي احتمال هو الي محركني دلوقتي بس انا تعبانة فعلا ومش قادرة احل حاجه انا مش قادرة احل بجد اظن طبيعي لأني كنت بسهر بحماس الفترة الي فاتت ده رد فعل طبيعي من جسمي بس مهما حصل انا هكمل
الناجح ناجح في كل مكان
الجملة دي حقيقة انا بحس انه مش مهم ادخل طب بشري او اي حاجه المهم مجال استمتع بيه وفيه بايو وكيمياء هو غريب صح بس مش بقول لحد انا بحب الكيمياء من أمتع المواد عندي بس بحب التشريح بردو بحب اوي ربط المواضيع واكتشف حاجات تانية اعرف الفرق بين الأنسجة واعرف اكون تعريف او اسم تعريفي له ، بنت جارتنا كانت جايبة مجموع هندسة في اقاليم بس أهلها مرضيوش ورغم كده ابنهم جاب اقل منها وهندسة اقاليم ودخلوه خاص بس عارفين هي أنجح منه بردو هي لقت شغل وناجحة فيه جدا وبتجيب عائد كويس اوي اوي بس هو مخلص ومفيش شغل له لحد دلوقتي انا حاسة اني كده انا مهما حصلي هبقى ناجحة لإني قادرة ابقى ناجحة
حياتي مرة ومش هيعيشها حد غيري
دي من اسباب استمراريتي انا عايزه مجال يخرجني برا مصر بأي شكل يخرجني برا قيود الفقر او الفلوس يعني انا الحمدلله مش فقيرة بس احنا بنحاول نتمالك نفسنا وبذات بابا يمكن الي محركني والي مخليني استمر هو اهلي أه هم مش عارفين او انا الي مبعرفش اظهر ده بس نفسي يعيشوا في نعيم نفسي يخرجوا براحتهم ينزلوا ديت مع بعض بدون ما يعملوا حساب فلوس دروسي او مصاريف المدارس او مصاريف الاكل قيود المال صعبة اوي ويمكن مصر مزودا القيود قيود
يمكن في أمل ؟
مخي مش بيبطل تفكير في الأمل خوف بلا سبب مش متخيلين خوف بجد لنا بخاف انا حتى النوم بقى صعب من التفكير انا لما بيجيلي سؤال صعب اول حاجه بتيجي في دماغي هو لو جالي سؤال بالمستوى ده في الامتحانات هقدر اعرفه؟ ولا هغلط فيه بردو زي دلوقتي ؟ انا في ضغط نفسي انا الي عملته محدش عاملي ضغط غيري وده الي مزعلني انا كل يوم عارفة ان الخوف والضغط الي بحطه لنفسي هيدمرني بس مش عارفة اشيله اعالجني منه
انا خايفة من الخوف
مش عارفة لو هتفهموني بس انا خايفة من الخوف خايفة اخاف في اللجنة وادمر تعبي في مدار السنة انا مراكمة حل ويمكن ده الي مخوفني اكتر انا خلصت كتاب كامل بس المراكماه هو الكتاب التاني شوفت فيديوهات لناس حلوا كتب اكتر مني أضعاف أضعاف وناقصني بال١٢٠ درجة انا خايفة خايفة لو حصلي كده بطني بتوجعني من التفكير قلقانة عايزه ابدأ مراجعه بسرعة من خوفي عايزه اطمن انا خايفة خايفة والخوف هو مشكلتي
الثقة تقدر ترجع؟
مبقاش عندي ثقة في حلي نهائي انا بحل وانا بدون ثقة انه انا صح من كتر الغلطات الي بغلطها اه المعدل بتاعي بيختلف في كل صفحة حرفيا بس انا اتدمرت ثقتي انا بحاول أظهر الثقة قدام الناس بس انا حقيقي معنديش ، انا كنت فقدت الأمل في الدراسة بعد تالتة اعدادي وماما اول نا ظهرت النتيجة ضربتي بالشبشب الموضوع بيضحك بس يا جماعه بجد لحد انهاردة انا متأثرة بالموضوع حرفيا ماما حتى محضنتنيش ولا اي حاجه مجرد شبشب اول ما عرفت اني جبت ٢٥٨ لما طنط جابتها من الكنترول بس بعدين عرفنا انها ٢٦٠ ونص وطلعت ماما عارفة اصلا عشان طنط جابت اثنين ومكنتش عارفة انهي فا ماما توقعت الاقل، انا محققتش هدفي في تالتة اعدادي اقدر أحقق هدفي دلوقتي ؟ انا تعبت عايزه اعيط دموعي مش قادرة امسكها انا خايفة انسى المنهج خايفة اوي عايزه كتب المراجعه عشان كده بس
نفسي في ٩٧ هقدر اعملها؟
Comments
Post a Comment